Il-Festival Nazzjonali tal-Ktieb 2023
Il-Festival Nazzjonali tal-Ktieb 2023 ittella’ bejn it-18 u t-22 ta’ Ottubru fl-MFCC, Ta’ Qali.
Skopri l-programm ta’ din is-sena mimli bi tnedijiet u preżentazzjonijiet ta’ kotba, laqgħat mal-awturi u mistednin internazzjonali, gruppi ta’ ħidma, diskussjonijiet tematiċi, skrinjar ta’ films, kif ukoll damma ta’ attivitajiet għat-tfal u l-istudenti.
Il-kunċert VII / Fidwa huwa l-uniku avveniment bi ħlas matul il-Festival Nazzjonali tal-Ktieb 2023; żjarat għall-Festival u għall-avvenimenti l-oħra kollha huma b’xejn. Xi masterclasses u workshops jeħtieġu li tirreġistra minn qabel – ara l-paġni tal-avvenimenti għad-dettalji.
Tista’ terġa’ tara wħud mill-avvenimenti billi tikklikkja fuq il-buttuna ‘watch event’ jew minn fuq il-paġna ta’ Facebook Malta Book Festival 2023.
Il-Festival Nazzjonali tal-Ktieb huwa l-akbar ċelebrazzjoni tal-ktieb fil-kalendarju kulturali Malti. Kull sena jattendu madwar 50,000 persuna u jipparteċipaw aktar minn 50 eżebitur. Il-Festival joffri wkoll diversi opportunitajiet għall-professjonisti fl-industrija sabiex jiltaqgħu u jsaħħu jew joħolqu relazzjonijiet ġodda.